"Hehh jaga tuh mulut ndra. Enak aja lu ngomong. Tahu dari mana lu kalo adek gua penghianat hah..?" Tanya si Mat Jaim ngotot.
"Lah ga usah basa basi lu im. Gua tahu komplotan lu juga ada kongkalikong sama Anj*** NICA. Jangan kira gua ga nyelidikin juga komplotan lu ye im. Lu sama adek lu tuh sama aja. Sama-sama babunye menir VOC. Dan asal lu tahu aja Im. banyak pejuang yang meregang nyawa gara-gara adek lo. Lu semua sama komplotan lu harus tanggung jawab. Atau jangan Kaget kalau suatu saat markas lu gua grebek.." Ancem Mahendra ga kalah sengit.
Padahal jelas adeknya Mat Jaim sering nyantronin markas kumpeni buat laporin pergerakan pejuang yang lagi ngerebut kemerdekaan di Batavia.
Cerita ini berlatar jaman penjajahan belanda di batavia. yang sekarang jakarta. Cerita ini juga hanya fiktif belaka. Bila ada kesamaan Nama dan tempat aye mohon maaf.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Dilema Sang Jagoan bag 3
Martado yang dengerin kata-kata babeh hanya bisa mengangguk. Diluaran emang banyak kacung kumpeni yang nyari keberadaan babeh. Termasuk gurunya juga si Mat gedor.
"Sebenernya gua cuma nyuruh si Dewi buat beresin Si Mugeni. Kelakuannye yang selama ini bikin resah rakyat mesti di hentikan. Tapi sayang, salah gua juga yang kasih tau nih markas ke Dewi. Akhirnye dia kemari juga..." ujar babeh yang geleng kepala sambil liatin Dewi yang masih pingsan.
"Jadi babeh juga dah sempet kesini buat mantau ni lokasi..?" Tanya Martado.
"Dah dari dua bulan yang lalu gua pantau ni tempat. Saat gua denger si Mugeni mau beroperasi ke cimanggis, langsung dah gua utus dewi buat beresin..."
"Ouhh gitu beh. Aye ngerti deh sekarang kenapa si Dewi ngotot kemari. Kayanya si Dewi emang pengen abisin sampe ke akar-akarnye. Secara si Mugeni yang emang suka lecehin kaum hawa dimane-mane.." Saut Martado.
"Begitu dah adatnya. Si Dewi ga suka kalo liat ada kaum hawa yang jadi korban nafsu bejat. oh iye..kenalin ni Mahendra murid gua. Lu pada belom kenalan kan?." Jelas babeh sambil ngenalin Mahendra ke Martado.
"Oh iye dari tadi kita disini belom saling kenal. Murid Bang safe'i mesti juga ga maen-maen nih punya ilmu. Baru sebentar aye liat jurusnya dah bikin aye geleng kepala. Salam kenal Mahen..aye murid Mat Gedor temen dekat Babeh safe'i.." Ujar Martado sambil ngulurin tangannye ke Mahendra.
Mahendra juga sambut tuh jabat tangan. Cuma biasa dah. Dikalangan dunia persilatan terkadang suka pengen nguji segede apa tenaga dalem orang tersebut. Hingga dalam keheningan terjadi deh saling cengkram bertenaga dalam tinggi.
Mahendra pun paham sama yang di lakuin Martado. Maka dia pun nyalurin tenaga dalem ke jabat tangan tersebut. Babeh juga paham. Tapi dia diem aje. Namanye anak muda, mesti jiwanya masih suka bergejolak. Babeh juga yakin kalo tenaga dalem mahendra ga kalah dari Martado.
Walalu muka mereka anteng, Tapi sebenernya mereka lagi fokus nyalurin tenaga dalemnye. Keliatan tuh dari masing-masing yang nonjol urat anu nye. Ehh urat tangannye maksud aye..hehe.
Bener-bener mereka ga mao ngalah. Terkadang kelepasan tuh bibir rada nyungging tanda nyeri yang menjalar. Cuma sebisa-bisa nye deh pada di antengin muka. Padahal masing-masing tangan dah berasa remuk redam.
"Behh...behh..babehh.." Tetiba si Dewi siuman terus merintih lemah manggil babehnye.
Seketika tuh adu tenaga dalem langsung kelar. Tangannye pada dilepas terus di umpetin di belakang sambil di gosok-gosok saking sakitnye. Sementare mukanye pada di senyum-senyumin biar kaga kentara (kelihatan) nahan nyeri.
Babeh yang denger langsung nyamperin Dewi yang siuman. Mukanya masih pucet. Babeh pun jadi iba. Dia pun duduk samping Dewi. Terus dia elus rambut si Dewi. Biar gimane juga babeh dah asuh si Dewi dari orok. Babeh dah anggep Dewi kaya anak sendiri. Walau kadang suka kasar juga sih. Tapi itu dia lakuin biar si Dewi mau denger nasehat babehnye.
"iye ni babeh...." Ucap babeh lembut sambil mandangin Dewi yang mulai meringis.
"Sakit beh.." lirih Dewi sambil raba pundaknye. Tapi Babeh langsung tepis lembut tangannye biar kaga sentuh luka yang baru kering.
"Iye sayang. Babeh ngerti. Tapi jangan dipegang dulu tuh luka.." Saut babeh kalem.
"Aus behh.. Ohok ohok.."
Babeh pun langsung nyuruh mahendra buat ambil aer di kendi. Mahendra bergegas. Ga lama aer dah disuguhin ke mulut Dewi.
"Makannya, Kalo babeh ngomong tuh dengerin. Babeh tu sayang sama Dewi. Ga mau liat terjadi apa-apa ma Dewi. Kaya sekarang nih. Kan dewi sendiri yang rasain kalo ga mao dengerin omongan babeh.." Babeh nasehatin biar si Dewi paham.
"Iye beh...Dewi minta maaf ye beh suka bikin repot babeh...Tapi..pulang nyok beh.."
Ini yang rada repot. Babeh mikir si Dewi masih lemah. Ngga bakalan bisa jalan jauh. Tapi kalo nunggu mendingan sampe besok pagi juga bisa berabe urusan. Kumpeni bakalan nongol disini.
"Ndra lu gemblok (gendong di punggung) dah adek lo..." Babeh tetiba nyuruh Mahendra. Yang disuruh mukanye langsung manyun saat itu juga.
"Aye lagi aja beh. Yang bader siapa..yang kena siapa..." Sergah si Mahendra yang ga mao kena getah kebandelan Dewi. Bukannye apa juga. ntu Jarak dari markas ke rumah babeh sekira hampir 80 kilo. Karuan aje si Mahen ogah.
"Nyolot lu..nyolot hah? Ngomong lagi gua gibeng tu congor!! Bentak babeh sambil siapin pukulan. Tu kepalan tangan si Babeh langsung berasep yang bikin Mahendra jadi ngeri liatnye.
Pernah si Mahendra kena hantem tuh pukulan. Mentalnye satu lapangan. Langsung nungging ga bergerak lagi.
"Ampun beh ampun. Iye beh iye..aye gendong deh ye.."
Cuman si Martado yang liat Dagelan tetiba punya ide yang langsung di usulin saat itu juga.
"Ehh..gini beh. Aye ada usul. Gimane kalo aye buatin tandu buat Dewi. Pan tar aye ikut. Jadi aye ma Mahen bakalan manggul si Dewi.."
"Nah gitu juga boleh. Ide bagus tuh. Ga kaya si Mahen yang otaknye tumpul gegara suka godain jande..."
Karena waktu dah mepet menuju terang, Akhirnya Martado sama Mahen keluar buat bikin tandu. Dibantu para pejuang, Tu tandu ga lama jadi juga.
Di laen rumah. Babeh Jamidin sama Babeh kandar udah berhasil nemuin tempat dimana beberapa peti berisi gulden di sembunyikan.
Ini juga karena Babeh Jamidin bisa maksa marsose buat nunjukin tempatnye. Ntu rumah emang sama sekali ga bisa dicurigai. Karena tempatnya yang berkumpul dengan rumah laennya. Biasanya kalo tempat sembunyi harta berada agak menjauh dari kampung, Tapi ini kalo marsose ga unjukin. Maka pejuang ga akan bisa nemu tu peti gulden.
"Kan maen dah ah. Kalo kita angkut nih semua peti, dijamin kumpeni bakal nguber-nguber kita sampe ke ujung dunia..behahaha.." Kelakar Jamidin yang di aminin sama Babeh kandar.
"Bener lu din. Baru kali ini nih kita dapet rampasan segini banyak. Mesti kumpeni kebakaran jenggot kalo besok pagi begitu mereka liat ni peti dah sirna dari tempatnye..." Saut Babeh Kandar yang matenye bebinar-binar liat tu gulden yang bejibun (banyak).
"Tapi biar gimane kita mesti bagi rata ni gulden. Termasuk tuh bocah cewe yang secara ga langsung dah bantu kita dengan beresin Si Murdalih sama Mugeni..." Ujar babeh Jamidin.
"Lu betul din...gua setuju. Pan ada gurunya tuh. Kasih aja dah ke dia berapa kantong gitu. Tapi gua kok ga kenal ya. Sementara si Martado ngenalin.."
"Ngapain lu pusingin yang begituan. Yang pasti tuh bocah mesti dapet bagian. Mo gurunya siapa kek. Dia yang wakilin dah.." Saut Babeh Kandar
Akhirnya ntu 4 peti gulden di angkut. Mereka bakal bagi rata sebagaimana biasa. termasuk bagian Dewi yang dah siap dalam 3 kantong.
🌹🌹🌹