Mahendra & Dewi Manjawati

Yang ada dalem kamar pada keambil perhatiannya dan langsung nengok ke arah pintu. Jujur aje dewi yang liat malah ngerutin jidat. Gimana nggak, Lah idungnye dah kaya kodok. Bibirnye mengsong dikit. Belom lagi mukanya yang penuh sama jerawat.

Karuan aja Si Dewi ga ngenalin tuh orang tua yang ngaku gurunya. Tapi kalo abangnye si bener emang. Kliatan dari tampangnye yang bulukan.

Ngeliat yang dalem ruangan pada bengong, Mahendra juga keheranan. terus dia nengok ke gurunya. Malah lebih parah dari si Dewi. Mungkin karena saking kagetnya dia rada lompat pas liat muka babehnya.

"Lah bujug..behh..napa muka lu jadi begini beh..?" Tanya si Mahendra yang kaget terus kebingungan sama muka babehnye yang sama sekali ga dia kenalin.

"Sstt diem lu hen. Duduk sana samping adek lo. Liat lukanya buruan.." Hardik si babeh sambil merintah si Mahendra.

Walau masih kebingungan. Mahendra nurut juga terus duduk samping Dewi.

"Martado..pake ilmu penyibak tabir lu..!! Si babeh nyuruh

Tapi yang denger karena kebingungan jelas nanya.

"Hmmm. Gua sih kenal suaranya. Tapi muka ente gua ga ngenalin. Siapa ente sebenernya..?" Tanya si Martado.

"Muridnye Mat Gedor mesti kenal siapa gua. Dah lu pake ilmu penyibak tabir lu. Tar lu tau siapa gua.." Saut si babeh.

Si Martado pun ngerutin jidat penasaran. Ternyata ni babeh kenal siapa gurunya. Karena itu akhirnya dia mulai make ilmu penyibak tabir. Matanye dia usap sambil baca mantra. Ga lama pas dia buka mata, baru dah jelas siapa nih Babeh yang ada didepannya. Dia pun terkejut.

"Babeh..Sa..."

"Sttttt....."

Selagi Martado mao nyebut nama tuh babeh, si babeh nyela duluan. Dan Martado pun paham kenapa si Babeh bersikap demikian.

"Gua minta yang laen pada keluar. kecuali murid-murid gua sama lu Mar..." Kembali Babeh nyuruh Martado.

Karna dia dah kenal sama si babeh yang deket banget ma gurunya Si Mat Gedor, Dia aminin tuh perintah. Dia pun nuyuruh Babeh jamidin sama Babeh Kandar buat nunggu diluar. Begitu juga para cewe.

Setelah pada keluar, babeh duduk di bangku samping tempat tidur. tangannya ngerogoh kantong buat ngambil tasbeh. Ga lama dia mulai zikir. Kelar zikir, dia usap mukanya perlahan. Yang liat penasaran dengan yang babeh lakuin.

Tapi rasa penasarannye terbayar pas liat muka Babeh yang kembali ke keadaan semula. Muka yang putih bersih bin kalem walau dah banyak kerutan tanda berumur. Ya muka Babeh Safe'i. Siapa lagi?.

"Bukan maen. Ni ilmu perubah wajah juga lagi di pelajarin ma guru aye beh. Tapi Babeh Gedor sama sekali belom mampu buat jalanin syaratnye. Nah salam hormat dari aye beh murid Mat Gedor..." Si Martado berkata sambil deketin babeh trus nunduk hormat lanjut salim tangan.

"Ckkcck..dah gede lu Mar. Terakhir gua kesana lu masih remaja. Sekarang ga kalah gagah ma murid gua si Mahen nih. Hehe. gimna kabar Babeh lu si Mat gedor..?" Tanya Babeh sambil ngelus-ngelus pundak Martado.

"Baek beh..dia sering banget cerita tentang babeh Safe'i yang dulu berjuang sama babeh Gedor buat lawan penjajah.." Jawab Martado secara lembut. Mang Martado terkenal banget sopan santunnya sama yang lebih tua. Teman-temannya juga ngakuin itu. Terlebih sama teman dekat gurunye.

"Nih..liat hen. Begini ni adat murid ama gurunye. Ga kaya lu yang nyelonong aje kalo ama gua.." Semprot si babeh ke Mahendra. Nah yang di semprot pan jadi keki dibuatnye.

Akhinye si Mahendra nyontohin tuh yang di lakuin Martado yang nunduk terus pengen salim.

"Aye juga beh..aye minta maaf kalo aye selama ini kaga sopan ma babeh ye..maafin aye beh"

Cuman pan si babeh dah ngitung. Nih hari dah yang kelima dimane si Mahen belom mandi-mandi juga. Karuan aja si Babeh ogah di sentuh-sentuh ma Mahendra. dan langsung neplakin tangannye Mahendra sampe kepental tuh tangan.

"Kaga sudi gua sentuhan ma manusia bulukan kaya lo hen. Lu liat nih Martado. Biar dikata banyak darah di baju, tapi muka ma badan bersih karena sering mandi. Ngga kaya lu dah kaya kucing takut ma aer..." Ejek si babeh serius.

Mahen langsung nekuk tuh muka terus balik lagi ketempat tidur. Si Dewi yang liat cuma mesam mesem aje liat Abangnye kena damprat ma babehnye.

"Apa lu senyam senyum wi. Gegara lu nih babeh jadi uring-uringan tau ga..?" Damprat si Mahendra yang gedeg ma Dewi yang malah senyam senyum liat mahendra kena semprot.

"Yee..situ yang disemprot keselnya ke aye bang bang..mikir aturannye bang..." Bales si Dewi.

"Lu juga mikir bocah. Ketimbang mahen, justru lu yang paling bader. Besok gua ganti nama lu jadi Dewi Baderwati lu mao hah..?" Kini giliran si Dewi yang kena damprat babeh. Dewi pun langsung manyun nundukin pala.

"Udah lu gua suruh pulang. Malah lu nyamperin abang lu. Terus lu kemari lagi. Udah ngerasa paling jagoan lu wi hah? punya ilmu baru segitu lu dah ngerusuh kemane-mane. Gimane nih kalo ga ada si Martado dan para pejuang? Dah tinggal nama lu wi. Lu paham kaga? Kalo ga paham biar gesper gua nih yang kasih lu paham.." Bentak si Babeh ke Dewi.

"Iye beh aye paham..aye minta maaf beh.." Bales dewi dengan suara rada merintih karena dadanya yang masih sakit.

"Napa tu pundak lu.?" Babeh nanya lagi

"Ketembus peluru beh.."

"Hmm tau rasa lu sekarang kan gimana rasanya tuh timah panas ketanem di dalem daging..?" Ujar si Babeh sambil nanya.

Babeh Safe'i sebenernya khawatir juga sama keadaan Dewi. Akhirnya ia bangkit terus periksa lukanya si Dewi.

"Adaww pelan-pelan napa beh.." Si Dewi kesakitan gegara Babeh megang pundaknye rada kasar.

"Hmmm..mayan dalem nih peluru. Kalo ga buru-buru dikeluarin bakal busuk tar pundak lu.." Jelas si Babeh yang bikin si Dewi jadi rada ciut.

"Cuma satu jalan keluarnye. Hen..sedot.." Tiba-tiba babeh nyuruh mahendra. Lah mahendra pan jadi rada melotot dengernye.

"Apaan beh..sedot??" Mahendra Nanya.

"Lu belum budeg kan hen? Sedot nih luka adek lo sampe keluar pelurunya. Buruan..."

"Ga salah beh..?"

Blegg..

Palanye Mahen kena toyor babeh sampe mo jomplang.

"Baru sebulan lalu lu gua ajarin ilmu sedot peluru. Pan sekarang jaman bedil. Itu ilmu kudu dipake bukan buat disimpen.."

"Tapi beh.."

Si babeh mao toyor lagi pala si Mahendra.

"Iye iye beh iye..aye sedooot.. Deh ye.." Saut si Mahendra yang langsung nengok ke Dewi yang pipinya tiba-tiba jadi merona dan tersenyum.