"Hehh jaga tuh mulut ndra. Enak aja lu ngomong. Tahu dari mana lu kalo adek gua penghianat hah..?" Tanya si Mat Jaim ngotot.
"Lah ga usah basa basi lu im. Gua tahu komplotan lu juga ada kongkalikong sama Anj*** NICA. Jangan kira gua ga nyelidikin juga komplotan lu ye im. Lu sama adek lu tuh sama aja. Sama-sama babunye menir VOC. Dan asal lu tahu aja Im. banyak pejuang yang meregang nyawa gara-gara adek lo. Lu semua sama komplotan lu harus tanggung jawab. Atau jangan Kaget kalau suatu saat markas lu gua grebek.." Ancem Mahendra ga kalah sengit.
Padahal jelas adeknya Mat Jaim sering nyantronin markas kumpeni buat laporin pergerakan pejuang yang lagi ngerebut kemerdekaan di Batavia.
Cerita ini berlatar jaman penjajahan belanda di batavia. yang sekarang jakarta. Cerita ini juga hanya fiktif belaka. Bila ada kesamaan Nama dan tempat aye mohon maaf.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Dewi tukang rusuh bag 7
Prok prokk prokkk...
Si Dewi teprok tangan. Bangga dia ama abangnye yang bulukan bisa bikin modar tuh lutung yang ilmunya tinggi. Dia juga salut sama jurus cakar neraka nya Mahendra yang makin hari makin ngeri aja akibatnye.
Jangankan Dewi. Babeh safe'i aja heran. Padahal babeh sendiri cuma bisa ngajarin sampe berasep doang tuh kuku. Tapi si Mahendra bisa ningkatin lagi kekuatan jurus cakar neraka. Kalo dari jalur ilmu yang diturunin dari babeh, belom ada satupun dari keluarganya yang bisa kaya mahendra. Termasuk babeh sendiri. Apalagi urusan bikin bola api yang bisa di luncurin. belom pernah babeh ngajarin begituan.
Tapi di jurus yang laennya emang mahendra jeblok dah. Cuma si Dewi yang bisa nguasain semua jurus yang di ajarin babeh. Termasuk satu jurus yang bentar lagi bakal dikeluarin sama dia.
"Lu ngapain sih pake teprak teprok segala. Lu kira gua lagi ngelenong hah..?" Mahendra nanggepin teprokannya dewi.
"Dih. Punya abang sewotan amat ya. Pan gua seneng bang kalo lu menang. Makan nye gua teprokin.." Jawab si Dewi.
"Heh. Dengerin nih wi. Menang jadi areng. Kalah jadi abu. Lu ngarti kaga..?"
"Alakh..so ngerendah lu bang. Padahal dalem hati mah lu seneng juga ngalahin tuh manusia beruk.."
"Yeee...iya juga sih hehehe.. Eh iye biar gimana gua kudu makasih sama adek gua yang paling tengil dah ngasih unjuk cara ngalahin tuh lutung.."
"Ah ga enak makasih nya pake bawa-bawa tengil..." Si Dewi ngambek terus mojok duduk deket pohon ga mau liat abang nye. Ngeliat adeknya ngambek Mahendra jadi ngerasa bersalah.
"iye deh adek yang paling cantik baek hati dan tidak sombong.." Mahendra sekarang muji sambil duduk disamping Dewi.
Dewi pun senyam senyum dibilang cantik ma mahendra. Baru kali ini abangnye muji. Hatinye pun jadi berbunga-bunga
"Tumben amat abangkuh..biasanya mah yang keluar dari mulut cuma bocah tengil. Bocah rese, bocah bader (nakal). Apalagi bang..?"
"Ah kan itu becandaan aje. Kan aslinye adek abang ini emang cantik. Namanye aja Dewi Sangarwati. Eh..Manjawati maksud abang..." kembali si mahendra godain adeknye. Tapi si dewi senyam senyum aje. Soalnya baru kali ini abangnye bilang dia cantik.
"iya dong kalo cantik mah emang dari sononye. Nah sekarang buka baju nya bang..."
Karuan aja Mahendra kaget. Apa maksudnye nih disuruh buka baju.
"Apa lu kata wi? Ga salah denger gua? Buka baju..?"
"Iye buka bajunye cepet ih..eh..eh..waah lu mah viktor duluan si bang. Maksud aye ntu badan kan pada lebam. Nah aye ada minyak gosok ramuan aye sendiri nih. Dijamin cespleng dah. buruan buka bajunye.." Si Dewi nyuruh abangnye.
"Ohh. Kirain mo ngapain. Hehe. Eh sejak kapan lu bikin ramuan wi..?" Mahendra nanya sambil buka bajunye. Kliatan dah tuh badannye pada biru kebiru-biruan gegara kena hantem serangan tiga lutung.
"Babeh pernah ngajarin bang. Jadi aye tinggal cari bahannye aja. Gampang ko bahanye banyak sekitar kita.." Jawab si dewi sambil buka botol kecil berbentuk lope yang dalemnye ada cairan berwarna merah kemerah-merahan.
Langsung dah tuh kan di olesin ke badan abangnye yang pada lebam disana sini. Si Mahendra ngerasa anget banget disekujur badannye.
"Emang bener cespleng ramuan si Dewi. Dah anget, trus berasa kaya di urut-urut sekujur tubuh gua. Mantul dah.." Puji Mahendra dalem hati.
Tapi tu ga lama. Karena pas rasa angetnye dah ngilang, mulai dah sekujur tubuhnya Mahendra berasa rada gatel. Cuman ga gatel banget sih.
"Wi..tu ramuan pake bahan apa yak..?"
"Minyak kelapa bang biasa lah.." Jawab dewi
"Terus apaan lagi..?"
"Bunga mawar aye remes trus ambil sarinye.." jawab si Dewi lagi
"Udah itu doang wi..?"
"Ada lagi sih bang yang paling penting."
"Apaan wi..?"
"Lendir bekicot.."
Karuan aja Mahendra kaget.
"Muke gile lu wi..lendir bekicot lu pake buat ramuan minyak oles. Pantesan badan gua pada gatel. Wah bener dah lu mang lagi dendem ma gua. Lu ngerjain gua yak..?"
"Dih siapa yang ngerjain? kalo kata babeh lendir bekicot bagus buat luka lebam. Luka kena sayat. Koreng dan kawan-kawannye. Emang berasa gatel dikit doang. Bentar juga ilang bebarengan ma tuh lebam-lebam di badan abang.." Si Dewi ngejelasin.
Tapi tetep aja mahendra kaga sudi di olesin ma lendir bekicot trus bajunye mo dipake lagi. Tapi ditahan ma dewi.
"Lah ngapa di pake lagi sih. Nanggung bang dikit lagi. Dah deh jangan jadi Mahendra Manjawati. Gatel dikit aje dah ngambek. Tahan dikit napah. Lu kan dah bulukan juga. Apa mo gua aduin ke babeh hah..?" Teges si dewi sambil ngancem terus diplorotin lagi tuh baju dan mulai ngoles lagi.
Si mahendra cuma bisa pasrah dah kalo dah di ancem gitu. Bisa di gedig palanye ama babeh kalo dia berani bikin kecewa adeknye.
🌹🌹🌹