Mahendra & Dewi Manjawati

Rumah babeh Syafe'i jauh dari pemukiman. Letaknye agak terpencil di tengah hutan. Dulu dia kesohor di daerah cinere sebagai jawara yang ga ada tanding.

Sepak terjangnye sebagai begundal ga usah ditanya lagi dah. Hampir semua preman daerah cinere betekuk lutut sama babeh safe'i. Sebutin aje deh biang rampok. Dedengkot begal. Bandar judi. Reman pasar. Buronan kumpeni. Lengkap dah gelar babeh safe"i pas masih berkelana di dunia hitam.

Cuma dua dia ga punya gelar. Mucikari sama penjahat kelamin. Bukan ape. Tuh dua bener-bener jadi pantangan buat dia. Soalnye kalo dia lakuin tuh dua pantangan, dijamin kesaktiannye luntur saat itu juga.

Nah sekarang dah ngarti pan kenape si Mahendra bener-bener jaga tuh imron biar kaga jadi liar. Dia ga mau ilmu yang selama ini dipelajarin rontok begitu aje. Tapi pan namanya anak muda. Ga tau kenape dia lebih suka godain jande. Padahal dia kalo dah mandi. Banyak bener gadis perawan yang ngantri mo jadi demenannye. Tapi ditolak semua. aneh kan tuh perangai si Mahendra yang malah milih jande.

Kita balik lagi ke babeh Safe'i. oh iye kebetulan nama babeh Safe'i mirip sama jawara pasar senen. cuma beda y doang. Yang di pasar senen namanye Syafe'i. Tapi mang sama-sama begundal juga dulunye.

Selama masih berkecimpung di dunia hitam, Bang safe'i sempet punya anak ma bini. anaknye dua. Bininye satu lah. Babeh Safe'i biar kata jadi jawara ga pernah maen cewe. Jadi dia setia ma bininye. Hal ini juga yang dulu jadi panutan anak buahnye. Pokoknye kalo ada yang berani maen cewe, mesti di gedig palanye ampe bocor ma babeh.

Sayangnye nih kedua anaknye meninggal gegara wabah cacar yang sempet melanda batavia waktu itu. Kumpeni sih punya obatnye. Cuma buat golongan dia ma kacung-kacungnye aje. Kalo buat rakyat mah sedikit yang dapet.

Disini babeh frustasi. hampir tiap malem kalo pulang mesti dalam keadaan mabok gegara sering nokib (minum miras). Dah gitu dia mulai ga percaya ma tuhan. Dah ga pernah solat lagi. dia kecewa sama anaknye yang terlalu cepet diambil ma tuhan. Padahal tuh buah hatinye yang bakalan nerusin kesaktiannye.

Bukan itu aje. Babeh safe'i juga makin kejam sama anak buahnye. Dikit-dikit gebug. Salah dikit gedig. Ampe akhirnye Anak buahnye pada kaga betah ma kelakuan babeh. Akhirnye di tinggalin kan dia ma anak buahnye. Bukan itu aje.

Ga lama bininya juga ga betah ma kelakuan babeh yang suka mabok. Dan si babeh makin kecewa dalam hidupnye. Suatu hari dia dapet laporan dari salah satu mantan anak buahnye, kalo bininye lagi deket ma laki-laki laen.

Babeh nyelidik. Dan bener ketauan bininye lagi selingkuh ma Jawara pondok labu. Tapi soal yang satu ini juga jadi pantangan buat dia. Dia paling anti gebukin cewe. Jadi pas liat bininye selingkuh dia ga ngapa-ngapain dan langsung pulang. Besoknye dia cerai tuh bininye.

Mulai dari sini dah babeh minggir. Dia tinggalin dunia hitam. Semua harta bendanye di bagi-bagiin ke anak buahnye. Sementara babeh sendiri minggir ngasingin diri ke tengah hutan di daerah ciputat. Dia bikin rumah deket sungai citarum. Disitu dah dia bebenah diri dan ningkatin kesaktiannye. Sampe suatu saat ketemu sama Mahendra dan Dewi Manjawati yang masih orok buat dijadiin penerus dari segala ilmu yang dia punya.

Soal nama si Dewi ini mang dulunya manja bener kelakuannye. Jadi dia di namain Dewi Manjawati. Nah kalo Mahendra mang rada-rada si babeh bikin nama. Dulu Mahendra punya temen namanya hendra. Suka maen di pasar buat jambret emak-emak. Karena suka beroperasi ma hendra temennye, akhirnye dinamain dah jadi Mahendra behahaha..ohok ohok. Kira-kira begitu pemirse.

Nah kita balik dah nyok ke mahendra yang dah nyampe rumah babehnye. Seperti biase kalo pagi-pagi babeh ga ada dirumah. Dia mesti lagi semadi di sungai citarum yang banyak batu gede dan arus yang deras.

Anehnya nih kalo babeh lagi semadi di atas batu gede, Arus sungai yang tadinya kenceng tiba-tiba jadi anteng. Dan ada yang bikin serem. Entah sejak kapan kalo babeh semadi banyak buaya yang ngerumunin babeh. Bahkan ada sebagian yang buaya putih. Entah kenape juga tuh buaye pada demen ma babeh dan jadi jinak ma babeh. Juga ma Mahendra dan Dewi.

Cuma buat si Dewi biar dikata tuh buaye dah jinak, tetep aje dia kaga berani deket-deket kalo babeh semadi. Bukan ape, selaen takut. dia juga geli. Bayangin puluhan buaya yang ngerumunin babeh aje dia dah merinding. Kecuali ma buaya darat doang dia berani. Salah satunye yang dia lagi bawa-bawa palanye entah kemane.

Pernah suatu saat Mahendra iseng ma Dewi gegara takut ma buaye. Pas lagi laporan ma Babeh di pinggir sungai, di jorogin dah ma Mahendra ke sungai. Ya jelas aje Dewi langsung nyemplung dan kelabakan ga kira-kira pas buaya ngerumunin dia.

Tapi karena dah jinak ya ga di apa-apain ma tuh buaye. Cuma Si Dewinya aje yang kaya cacing kepanasan. Mang dari dulu suka berantem akhirnye kejar-kejaran dah tuh ade kakak di tengah hutan. Si babeh mah cuma geleng kepala aje liat kelakuan muridnye.

Semenjak saat itu ga berani lagi Si Dewi nyamperin babehnya walau di pinggir sungai. takut si Mahendra iseng lagi.

Nah pagi itu Mahendra mo nyamperin babeh yang lagi semadi. Dia liat si babeh lagi bener-bener khusyuk zikir megang tasbeh ditangan kanannye. Perawakan babeh mang dah rada tua. Kerutan wajahnye yang bilangin. juga uban dan jenggot putihnye yang menjuntai sampe perut. Pake kopiah warna item dan pakean Pangsi ala betawi warna abu-abu. Lengkap sama kopel gede di pinggang.

Mahendra manteng aje pinggir sungai. Kaga berani dia bersuara sedikitpun kecuali babeh duluan yang bicara. Ga lama babeh pun ngomong tapi mata masih merem khusyu.

"Gua tau lu dah sampe ndra..nah gimana kerjaan lu kemaren dah tuntas belom..?" Babeh nanya masih sambil merem dan tu tasbeh masih diputar terus.

"iye beh aye dah dateng ini buat laporan. aye dah beresin si Mat Jaim beh..." Jawab si mahendra rada gemetar karena si babeh tar mesti nanyain si Dewi..

"Beresin gimana maksud lu ndra..?" Tanya babeh lagi masih dengan suara yang anteng.

"Ehh..Mat Jaim dah modar beh. Terpakse aye lakuin itu karena si Mat Jaim kaga mau nyerah dan terus makin kalap.." Mahendra jelasin masih rada gemeter dan kepala nunduk.

"Ya uda itu bukan salah lu. Itu dah jadi kodrat dia. Terus ada laporan apa lagi ndra..?"

"Ehh....itu beh. Gurunye si Mat Jaim sama puluhan muridnye nyamperin terus kaga terima kalo Mat Jaim meregang nyawa. Akhirnye dia nyerang keroyokan beh.." Jawab Si Mahendra lagi. Tapi ga dia terusin berharap si Babeh ga nanya lagi. Tapi jelas ngga begitu.

"Terus gimane?..kalo lu ada disini berarti lu dah beresin juga gurunye..?" Kali ini si babeh nanya sambil buka matanye. Dia liatin mahendra yang rada gemetar sambil nundukin pala.

"Bukan aye beh yang beresin. Tapi si Dewi. Dia terpaksa keluarin jurus rengkah bumi. Itu dia lakuin buat lindungin aye yang masih rada lemah buat betarung.." Kembali Mahendra jelasin. Tapi kali ini dia nengadahin palanye. Keliatan dah tuh ma babeh muka Mahendra yang masih rada bonyok.

"Hmmm mayan juga si Mat Jaim dah bikin lu bonyok ndra. Tapi gua ga nanya itu. Yang gua tanya kenape tiba-tiba si Dewi ada disitu ma lu hah?". Mulai ni Babeh rada tinggi nadanye. Jelas mahendra nunduk lagi palanye.

"Aye juga ga tau beh. Tiba-tiba dia nongol begitu aje terus bawa pala si Mugeni lagi..?" Biar rada gemeter Mahendra merasa harus jelasin yang sebenernye. Jelas aje Si babeh keperanjat.

"Ape..?? Dewi bawa kepala..? Kepala doang maksud lu ndra..?". Si babeh makin lantang nanyanye. Matanya juga mulai melotot. Sementara Mahendra makin kicep aje. Tapi mo ga mao dia mesti buka suara juga.

"Iye beh..dia bawa pala doang di bungkusin kaen. Dia bilang babeh minta tanda. Terus akhirnye si dewi bawa palanye buat dibawa ke babeh katanye. trus pas mao pulang kesini si Dewi malah pamit beh entah kemane bawa tu pala.." Jelas si Mahendra.

Tapi kali ini babeh bener-bener kaya di samber petir denger jawaban Mahendra. Hingga akhirnye.......

PLAAAAAAKKKKK.

Tiba-tiba aje badan mahendra muter ga ketulungan terus terjerembab dan kejengkang di tanah. Ternyata si Babeh dah nampar Mahendra. Yang bikin ngeri nih si babeh jaraknye masih jauh sekire satu lapangan dah ma mahendra. Tapi anehnye tu tamparan nyampe juga ke pipi Mahendra. Dan lebih ngeri lagi si babeh keliatan ga ngapa-ngapain. Tangannye masih megang tasbeh. Yang atu lagi juga masih diem. Entah ilmu apa deh yang babeh punya sampe si Mahendra melintir ga karuan.

"Dasar goblok lu jadi abang seperguran. Gua kaga pernah minta tanda. Lu dah di boongin sama si Dewi...!!!" Si babeh langsung tereak dan meledak emosinye. Bahkan sampe buaye di sekitar pada bubar karena getaran yang di timbulin dari tereakan Babeh Safe'i.

"Ampuun behh..aye kaga ngarti..aye juga bingung beh. Padahal aye dah maksa dia buat pulang, tapi dia kaga mau.." Jelas si mahendra sambil megang pipinye yang tambah lebam.

Si babeh berdiri. Terus dalem sekali lompat dia dah sampe depan mahendra.

"Kali ini kita kecolongan ndra. Gua juga yang salah dah percayain Dewi ma lu. Aturannye ni urusan gua kudu turun langsung. Gua tau si Dewi sekarang kemane. Dan ini bakalan jadi urusan yang runyam. Bener-bener runyam ndra. Nah sekarang kita kudu nyusul si Dewi. Mudah-mudahan si Dewi belom lakuin hal yang gila disana..."

Babeh ngulurin tangan ke Mahendra. Mereka mereka mesti bergegas sebelom terjadi hal yang gak mereka inginkan. Tapi si Mahendra masih kebingungan dengan apa yang sebenernye terjadi. Dia cuma nurutin aja babehnye terus ikut ngacir ma babeh ke arah si Dewi pergi.