Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Ke markas van de brenk bag 4
“Gimane nih, Mbul. Mau ditolongin, tapi kubangan tai. Lu nyemplung gih, tolongin tuh Mat Kodir,” ucap si Babeh sambil garuk-garuk kepala, bingung tapi tetep santai.
Sementara si Jambul cuma diem aje. Jelas kagak bakal mau dia nyemplung ke kubangan begituan. Belatung aje keliatan gerak-gerak di permukaan.
“Gak dah, Beh. Mending aye nyium kentut Babeh aje ampe modar, ketimbang nyemplung ke situ… hiii… hoekkk,” bales si Jambul sambil nahan muntah, mukanye udah meringis jijik.
Sementara mereka masih debat, si Mat Kodir makin kelelep. Tangan yang tadinye berusaha nggapai-nggapai pelan-pelan hilang dari permukaan. Suaranye makin kecil… sampe akhirnya—
Diam.
Kagak ada suara lagi. Tubuhnya tenggelam sepenuhnye. Mati kelelep… nelen tai.
“Yah… mati dah, Mbul. Lu sih. Ilang juga duit lima puluh gulden. Hadehh… punya murid kagak sabaran, begini nih jadinye,” keluh si Babeh sambil geleng-geleng, matanye melototin Jambul dengan kesal.
“Sori, Beh… aye kagak sengaja,” ucap si Jambul pelan, kepalanye nunduk, rada nyesel.
“Sori-sori mulu. Laen kali kalo nendang orang, jangan diarhin ke kubangan jamban. Dah lah… udah mati tuh orang. Mau diapain lagi,” ucap si Babeh, napas panjang, pasrah.
“Yah… nasib dah tuh dedengkot rampok Rawabogel. Akhirnye mati kelelep tai. Tapi pantes sih. Tuh tangan sama batang singkongnye udah belepotan dosa. Emang udah takdirnye dia mati nelen tai,” ucap si Babeh pasrah, sambil geleng-geleng.
“Betul, Beh. Orang kayak gitu emang pantes mati. Lagi juga masih ada si Jalu noh, temennye. Pan masih sisa gocap, Beh. Apalagi nanti di markasnye pasti banyak harta,” ucap si Jambul, matanye mulai berbinar lagi kebayang duit.
“Ya udah deh… ikhlasin aje si Mat Kodir,” kata si Babeh, narik napas panjang.
Mereka berdua pun deketin si Jalu, yang mukanye makin pucet begitu tau si Kodir beneran modar di kubangan jamban.
“Nah, lo… kalo kagak mau nyusul temen lo mati di kubangan jamban, jangan coba-coba kabur ye. Gua mau ngacak-ngacak sarang lo dolo,” ancem si Babeh, nadanye datar tapi dingin, ke arah si Jalu yang masih keiket di batang pohon.
“I-i-iye, Beh… aye kagak bakal kabur kok. Mending aye mati digantung Belande daripada mati ngenes di lobang jamban,” bales si Jalu ketakutan, suaranye gemeter, badan nye kaku.
“Mbul, tunjukin di mane tuh sarang rampok,” perintah si Babeh.
“Siap, Beh,” jawab si Jambul tegas.
Tanpa banyak cingcong, si Jambul langsung berkelebat nyusurin jalur yang tadi dia lewatin. Tubuhnya ringan, lompat dari batang ke batang. Di belakang, si Babeh Kribo ngikutin santai, tapi gerakannye halus, nyaris kagak kedengeran.
Sebenernye si Babeh agak gedeg juga sama si Jambul. Gara-gara kejadian tadi, pendapatan jadi berkurang. Tapi ya… namanye juga bocah. Suka spontan, kadang kagak mikir panjang. Si Babeh cuma bisa maklum.
Lagipula, dia tau dari mane sifat itu dateng.
Orang tua si Jambul dulu juga jagoan Betawi. Tegas, berani, kagak suka liat kejahatan merajalela. Jadi wajar kalo darah itu nurun ke anaknye.
Cuma sayang… nasib berkata lain.
Orang tua Jambul mati dikeroyok musuh-musuhnya sendiri. Orang-orang yang kagak suka sama sepak terjang mereka di tanah Betawi.
Waktu itu, rumah mereka dibakar.
Dan di tengah kobaran api, ada bayi kecil yang hampir aja ikut jadi abu.
Beruntung, si Babeh Kribo dateng tepat waktu. Dia nerobos api, nyelametin si Jambul yang masih orok, lalu bawa pergi sebelum semuanya terlambat.
Sejak saat itu, si Jambul diasuh sama si Babeh.
Tapi sampe sekarang… si Babeh belom pernah ngasih tau siapa Jambul sebenernye. Buat Jambul, si Babeh ya udah kayak orang tua kandungnya sendiri.
Dan si Babeh pun sengaja nahan cerita itu.
Dia pengen si Jambul fokus dulu latihan silat sampe bener-bener matang. Ntar kalo waktunye udah tepat… barulah semua kebenaran bakal dia beberin pelan-pelan.
