Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Ke markas van de brenk bag 5
Akhirnye, si Jambul sama si Babeh sampe juga di pinggiran perkemahan. Dari balik rimbunnye semak, mereka ngeliat jelas suasana di dalam. Asap masih ngepul dari api bakaran, suara tawa kasar bercampur sama bau tuak yang nyegrak.
Si Babeh ngelangkah keluar duluan. Santai aje, kayak orang mau numpang lewat. Sementara si Jambul ngikut di belakang, matanye nyapu satu-satu wajah para rampok itu.
Begitu liat ada orang asing masuk, suasana langsung berubah. Tawa berhenti. Beberapa orang langsung berdiri, tangan refleks megang golok.
“Heh! Siape lu berdua?!” bentak salah satu dari mereka.
Si Babeh berhenti di tengah perkemahan. Tangannye masuk ke belakang punggung, mukanye santai tapi matanye dingin.
“Gua kasih pilihan nih, ye… pada nyerah, bertobat, terus ikut gua ke menir… atau…” dia jeda sebentar, senyumnya tipis, “gua babat batang leher lu semua di sini.”
Sejenak hening.
Lalu—
“Hahahaha!!”
Tawa meledak dari segala arah.
“Dengerin tuh orang tua! Ngejago di sarang sendiri!”
“Cuma berdua berani nantangin kite semua?”
“Udah tua, pikun pula kayaknye!”
Salah satu yang paling gede badannye maju ke depan, mukanye penuh bekas luka.
“Bocah sama kakek bau tanah… mau ngajak mati ya?” katanya sambil nyengir nyeremin.
Si Jambul nengok ke Babeh.
“Beh… kayaknye mereka milih opsi kedua,” bisiknya santai.
Si Babeh ngangguk pelan.
“Iye… sayang juga sih. Padahal gua lagi pengen hemat tenaga,” gumamnya.
Dalam sekejap—
Sringgg!
Golok mulai pada keluar.
“BUNUH MEREKA!!”
Teriakan menggema.
Puluhan rampok langsung nyerbu dari berbagai arah.
Si Jambul langsung melesat duluan.
Wusss!
Dia nyelinap di antara dua orang, badan merunduk, lalu—
Bug! Bug!
Dua pukulan cepat ke perut, bikin dua orang langsung tumbang sambil muntah.
Di sisi lain, si Babeh masih berdiri santai…
sampe satu rampok nekat nyabet dari belakang.
Wusss!
Golok nyaris kena—tapi si Babeh cuma geser dikit.
Tanpa nengok—
Plak!
Satu tamparan ke arah pelaku.
Rampok itu langsung muter di tempat, terus—
Brukkk!
Ambruk ke tanah, kagak bangun lagi.
“Dableg… serangan kayak gitu mah buat ngusir ayam,” gumam si Babeh.
Sementara itu, si Jambul makin panas. Ingatan tentang tiga gadis yang diiket tadi bikin gerakannye makin ganas.
Buaaagh!
Satu tendangan muter ngehantam dada lawan.
Duk!
Satu sapuan kaki bikin orang jatoh, langsung disusul pukulan ke rahang.
Perkemahan yang tadinye santai berubah jadi kacau.
Teriakan, benturan, sama suara tubuh jatoh bersahutan.
Di tengah kekacauan itu, si Babeh ngelirik ke arah Jambul.
“Hah… baru gini doang udah ngos-ngosan. Masih jauh lu, Mbul,” celetuknya santai.
“Nyantai, Beh… ini pemanasan doang!” bales si Jambul sambil nyengir.
Tapi dari kejauhan…
Seseorang berdiri.
Badannye lebih tegap dari yang lain. Tatapannye tajem. Dan aura nye beda.
Dia belum bergerak.
Cuma… ngeliatin.
Dan senyumnya tipis.
Kayak nunggu giliran.
Sosok itu akhirnya melangkah maju dari balik kerumunan yang mulai kocar-kacir. Langkahnya pelan, tapi tiap pijakan kayak bikin suasana langsung berat. Beberapa rampok yang tadinya masih berani, langsung minggir ngasih jalan.
“Heh… mundur lu semua. Biar gua yang urus,” ucapnya pelan, tapi tegas.
Si Jambul langsung berhenti sebentar, matanye nyipit.
“Beh… nih orang kayaknye beda,” bisiknya.
Si Babeh ngelirik sekilas, terus nyengir tipis.
“Iye… akhirnya keluar juga yang agak bener,” gumamnya santai.
Orang itu berdiri di depan mereka. Badannya tinggi, ototnye padet, di pipinye ada bekas luka panjang. Golok di pinggangnye lebih gede dari yang lain.
“Jadi… lu berdua yang bikin ribut di sarang gua?” ucapnya dingin.
“Wah… sarang lu, ye? Bagus. Jadi sekalian aje kita beresin,” jawab si Babeh enteng.
Orang itu nyengir.
“Nama gua Rangga Lodra. Yang lain cuma kacung. Kalo mau cari mati… lu ketemu orang yang pas.”
Belom juga kalimatnye abis—
WUSSS!!
Rangga langsung menghilang dari tempatnya.
“Cepet banget!” Jambul kaget.
Tiba-tiba—
SRAAANG!!
Golok muncul dari samping, nyabet ke arah leher Jambul.
Tang!
Jambul sempet nahan pake tangan kosong, tapi tetep mental mundur beberapa langkah.
“Beh! Ini bukan kaleng-kaleng!” teriak Jambul.
“Makannye… jangan kebanyakan gaya,” bales si Babeh santai, tapi matanye mulai serius.
Rangga kagak ngasih jeda.
Wusss! Wusss!
Serangan datang bertubi-tubi. Gerakannye cepet, tenaga nye berat. Setiap tebasan bikin angin berdesing.
Jambul mulai keteteran.
Dia lompat, nunduk, muter badan—tapi tetep kena gores dikit di lengannya.
“Ck… sial!” geramnya.
Di kejauhan, tiga gadis yang diiket cuma bisa liat dengan mata penuh harap.
Sementara si Babeh…
masih berdiri.
Belom ikut turun tangan.
“Hah… jadi ini batas lu sekarang, Mbul?” gumamnya pelan.
Rangga nyengir liat Jambul mulai kepancing.
“Bocah… lu cepet. Tapi masih mentah!”
Braaakk!
Satu tebasan kuat bikin Jambul kelempar ke batang pohon.
Debu beterbangan.
Jambul bangkit pelan, napasnya mulai berat.
Tapi matanye berubah.
Lebih fokus.
Lebih tajem.
“Ya udah… kalo gitu… gua serius dikit,” ucapnya lirih.
Di belakang—
si Babeh akhirnya geser satu langkah.
“Jangan mati dulu, Mbul. Gua belom ngajarin yang terakhir,” celetuknya santai.
Sementara Rangga…
mulai maju lagi.
Kali ini lebih niat buat ngabisin.
