Di kerasnye kehidupan pinggiran Betawi, ada bocah tengil bernama Jambul yang mulutnye ceplas-ceplos tapi nyalinya kagak kalah sama jagoan gede. Bareng gurunye yang nyentrik, si Babeh Kribo, Jambul belajar silat, akal-akalan, sampe cara bertahan idup di dunia yang penuh tipu daya.
Dari satu masalah ke masalah lain, Jambul sering kejebak urusan sama rampok, buronan, sampe rahasia gelap yang ngumpet di balik hutan dan kampung. Tapi dengan gaya santai, tingkah kocak, dan kemampuan yang makin hari makin jadi, dia pelan-pelan ngebuktiin kalo dirinya bukan bocah sembarangan.
Penuh tawa, bahaya, dan ambisi, perjalanan si Jambul jadi kisah seru tentang keberanian, kecerdikan, dan mimpi besar… walau kadang dimulai cuma dari niat sederhana: nyari duit sama petualangan.
Karya ini diterbitkan atas izin NovelToon Bang Jigur, isi konten hanyalah pandangan pribadi pembuatnya, tidak mewakili NovelToon sendiri
Ke markas van de brenk bag 3
Terus si Babeh nengok ke Jambul.
“Mbul, lu periksa tuh perkemahan. Kalo emang beneran ada, buruan balik lagi ke sini,” perintah si Babeh, nadanye tegas.
“Oke, Beh. Aye cabut dulu,” bales si Jambul.
Tanpa banyak gaya, si Jambul langsung melesat masuk ke dalam hutan, gerakannye cepet kayak bayangan. Sementara itu, si Babeh tetep di tempat, jagain dua rampok yang lagi diiket.
“Awas kalo lu bohong, Dir. Kentut gua selanjutnye bakal bikin pala lu meledak,” ancam si Babeh santai, tapi bikin merinding.
Karuan aje si Mat Kodir makin jiper, mukanye kecut.
“J-jangan, Beh… ampun deh. Gua masih mau hidup. Gua mau tobat, Beh… sumpah,” ucapnye ketakutan, suaranye gemeter.
“Ngomong aje lu mau tobat. Terserah ntar Menir Van de Brenk yang mutusin. Kalo lu dipenjara, bisa lama. Atau… bisa jadi besok lu udah modar di tiang gantungan,” ucap si Babeh sambil nyengir tipis.
“Hahaha…” tawanye pelan, tapi cukup bikin si Mat Kodir makin ciut nyalinya.
Sementara itu si Jambul terus melesat dari pohon ke pohon. Ilmu peringan tubuhnye udah lumayan, walau kadang sempet kepeleset dikit, tapi dia masih bisa ngimbangin badan biar kagak jatoh.
Jelas beda jauh sama si Babeh. Jangankan napasnye, suara kakinye aje udah kagak kedengeran kalo lagi lompat ke sana kemari. Bayangan pun kayak ilang.
Maklum, si Jambul emang belom tuntas belajarnye sama Babeh Kribo.
Sampe akhirnya, dia nyampe di sebuah aer terjun.
“Nah, nih gua nemu aer terjun… kira-kira di mane ye sarang tuh rampok?” ucap si Jambul pelan, sambil nengok ke sana kemari dari atas pohon.
Ga lama, matanye nangkep asap yang ngebumbung tinggi di kejauhan. Masih agak jauh, tapi instingnye langsung bilang—di situlah tempatnye.
Tanpa ragu, Jambul langsung melesat lagi, nembus rimbunnye pepohonan. Matahari makin naik, cahayanye nyelip di sela-sela daun.
Akhirnye, dia berhenti di satu pohon gede.
Dan bener aje…
Perkemahan itu ada.
Dari atas, Jambul ngeliat jelas aktivitas di bawah. Banyak orang lagi bakar ikan, ada yang rebahan santai, ada yang minum tuak sambil ketawa-ketiwi. Beberapa orang lagi ngumpulin bungkusan—kayaknya hasil rampokan.
Tapi yang paling bikin darah Jambul langsung panas…
Ada tiga gadis diiket di pohon. Badannye penuh luka, pakaiannye hampir kagak nutupin tubuh.
“Bajingan… kumpulan manusia bejat,” geram si Jambul pelan dari kejauhan, rahangnye mengeras.
Kalo aje dia kagak inget pesan si Babeh yang nyuruh langsung balik, mungkin udah dia labrak tuh tempat sendirian.
“Sabar ya, Mpok… entar Jambul balik lagi,” ucapnye dalem hati, matanye masih mantengin mereka dengan penuh tekad.
Tanpa buang waktu, si Jambul langsung melesat balik, nyusurin jalur pohon buat ngasih laporan ke gurunye.
Begitu sampe, si Jambul langsung melesat dari atas pohon. Kakinye terjulur ke depan, ngarah lurus ke si Mat Kodir.
Buaaaaghhhh!
Mat Kodir langsung mental, badannye melayang, terus—
Byurrr!
Nyemplung ke jamban penuh tai.
Si Babeh jelas kaget liat si Jambul kalap begitu.
“Woy, botak! Lu ngapain nyerang si Mat Kodir sampe nyemplung ke jamban gitu? Kalo mati gimane? Kagak dapet duit kite, pe’a lu ya!” bentak si Babeh Kribo, kesel.
“Abis aye kesel, Beh! Di perkemahan ada tiga cewe diculik. Parah, badannye hampir bugil, penuh luka. Kejem banget kelakuan mereka!” bales si Jambul, napasnye masih ngos-ngosan, matanye nyala penuh emosi.
Si Babeh diem sebentar, mukanye agak mereda.
“Oh gitu… oke, gua paham. Tapi jangan si Mat Kodir yang lu bikin modar. Palanye berharga itu. Nah, kalo anak buahnye di perkemahan, boleh deh kite babat abis. Tapi kalo mereka janji tobat, ya lepasin. Cuman kalo ada yang ngotot… ya kite tebas batang lehernye,” jelas si Babeh dingin.
Sementara itu, dari kubangan jamban penuh tai, terdengar suara si Mat Kodir teriak histeris.
“Tuluuung! Tuluuung… woy, tuluuung!” teriaknye panik, suaranye hampir ketelen bau.
Si Babeh sama Jambul langsung nengok, terus lari ke arah jamban.
Dan begitu ngeliat…
Kepala si Mat Kodir udah hampir tenggelam di kubangan tai, tinggal nyisain hidung sama mata yang masih berusaha napas.
