Si Jambul

Maka masuklah si Babeh ke dalam bersama si Jalu. Pintu ditutup pelan di belakang mereka, sementara si penjaga berdiri di samping, siap siaga.

“Pagi, Menir. Maaf aye ganggu. Tapi aye ke sini bawa orang yang udah lama dicari kumpeni… si Jalu,” sapa si Babeh santai, sambil narik sedikit tali iketan si Jalu biar maju.

Van de Brenk langsung berdiri dari kursinye. Matanye tajem merhatiin si Jalu, lalu dia melangkah mendekat. Pelan-pelan dia muterin si Jalu, dari depan ke samping, sambil sesekali ngusap dagu.

“Hmmm… jadi ini yang namanye Jalu,” gumamnya. Tiba-tiba dia berhenti di depan, matanye melotot. “Mana temen lo… si Mat Kodir, heh?”

Si Jalu langsung gemeter.

“U-udah modar, Menir… kecemplung di kubangan tai,” jawabnya takut-takut.

Van de Brenk langsung tersentak.

“Hah?! Yang bener lu? Masa sesakti si Kodir bisa mokat?” tanyanya, nada suaranye campur heran sama nggak percaya.

“B-bener, Menir… tanya aje sama dia… si Babeh… yang punya julukan Setan Kribo,” jelas si Jalu sambil nengok ke arah si Babeh.

Untuk ketiga kalinye, Van de Brenk bener-bener kaget. Alisnya sampe naik tinggi.

“Buset… Setan Kribo?” Dia langsung noleh ke si Babeh. “Jadi… lu yang namanye Setan Kribo? Yang suka nangkepin kriminal di Batavia, hah?”

Si Babeh nyengir santai, tangannye masuk ke belakang punggung.

“Aye, Menir… bener, hehe,” jawabnya enteng.

Van de Brenk ketawa kecil, keliatan kagum.

“Bener-bener ye… nama lu udah sering gua denger. Lu banyak jasa sama kumpeni di Batavia. Dan sekarang… sampe juga lu ke Depok. Gile bener… hehe. Boleh-boleh,” pujinya.

“Ah… aye mah cuma nangkepin yang emang udah buronan kelas kakap, Menir. Yang kejahatannye udah kagak bisa ditolerir lagi,” balas si Babeh santai, tapi nadanye tegas.

Lalu si Van de Brenk ngerogoh kantongnya, ngeluarin bungkusan kecil berisi keping gulden. Dia lempar beberapa keping ke arah si Babeh.

Kincringg…

“Nah tuh balesannye. Sekarang lu minggat deh, Beh,” ucapnya enteng, seolah kagak ada apa-apa.

Si Babeh nangkep duit itu, terus langsung dihitung. Alisnya langsung naik.

“Lah… kok cuma tiga puluh gulden doang, Menir? Perjanjian kan di gambar yang disebar lima puluh gulden?” tanyanya, nada heran tapi masih ditahan.

Tiba-tiba muka Van de Brenk berubah. Matanya melotot tajem.

“Heh, Setan Kribo… masih untung lu gua kasih segitu. Biasanye kagak gua kasih sama sekali. Lu ambil syukur. Kalo kagak mau, sini balikin!” bentaknya. Dia maju selangkah. “Atau… gua tangkep lu sekarang juga. Lu kira lu kebal hukum kumpeni? Gimana?”

Ruangan langsung kerasa tegang.

Si Babeh cuma manyun dikit. Bukan sekali dua kali dia ketemu menir model begini.

“Hmmm… iye deh. Aye terima. Makasih, Menir. Aye pamit,” ucapnya akhirnya, nada lemes tapi matanya sempet nyimpen sesuatu.

Tanpa banyak omong lagi, dia langsung muter badan dan keluar dari kantor. Langkahnya cepet, nggak mau lama-lama di situ.

Begitu keluar gerbang, dia liat si Jambul lagi duduk di tanah, ngorek-ngorek pake ranting.

“Bocah kagak ada kerjaan. Lu mau nyari undur-undur buat cemilan?” celetuk si Babeh.

Si Jambul nengok, mukanye agak aneh.

“Beh… perasaan aye tiba-tiba kaga enak. Kenape ye?” tanyanya pelan.

Si Babeh sempet diem sebentar, terus ngangguk dikit.

“Sama, Babeh juga ngerasain. Udah, kagak usah dipikirin. Mending kite buru-buru cabut dari sini. Lu mau makan sate buaye, kan? Nyok, kite cari lapaknye di Pondok Cina,” ajaknya.

Si Jambul geleng.

“Ah… aye jadi kaga pengen, Beh. Mending kite balik ke goa aje. Ambil tuh rampasan, terus kite jualin,” balasnya.

“Heh, Babeh laper. Pokoknye makan dulu. Kagak pake bacot. Dah, ikut nyok,” kata si Babeh maksa.

Si Jambul ngedumel dikit, tapi akhirnya berdiri juga. Dia jalan ngikut di samping si Babeh, meski mukanye masih nyimpen rasa nggak enak yang tadi.

Dan tanpa mereka sadari…

urusan mereka sama kumpeni… kayaknye belom bener-bener selesai.

Sampelah mereka di lapak sate Engkoh Boang Teng, yang emang udah terkenal di daerah Pondok Cina. Lapaknya sederhana, tapi rame. Asap dari pembakaran sate ngepul terus, baunya nyebar kemana-mana bikin perut langsung keroncongan. Macem-macem sate ada di situ—ayam, sapi, buaye, sampe uler juga ada. Lengkap dah pokoknye.

“Koh… sate buaye satu, sama sate ayam satu ye,” pesen si Babeh sambil duduk santai di bangku kayu.

“Hayya… tumbenan hali ini ada pelanggan mesen buaya. Lu demen buaya juga lupanya?” tanya si Engkoh dengan logat cadelnye. Umurnye juga kurang lebih sepantaran sama si Babeh, rambutnye udah pada ubanan.

“Bukan gue, Koh… tapi si botak nih,” jawab si Babeh sambil nunjuk ke arah si Jambul.

Si Engkoh langsung nengok ke Jambul, matanye agak nyipit.

“Hayya… lu masil kecil ha? Tapi lu suka daging buaya?” tanyanye heran.

“Hehe… iya, Koh,” jawab si Jambul sambil nyengir dikit.

“Wahh… bagus itu buat numbuhin lambut lu yang botak, hehe. Oke, gua siapin dulu ye,” ujar si Engkoh, terus langsung nyelonong ke dapur di belakang.

Si Jambul langsung manyun, matanye ngelirik ke samping.

“Botak lagi aje yang kena…” gerendengnye dalam hati, kesel tapi cuma bisa pasrah.

Nggak lama, datenglah pesenan mereka. Sepiring sate ayam sama sate buaye masih ngebul, aromanye langsung nyamber hidung. Si Babeh tanpa basa-basi langsung nyamber sate ayam, dilahap dengan lahap. Dagingnye empuk, bakarnye pas, bumbunye nyerep sampe dalem.

“Wahh… mantap bener nih,” gumamnya sambil terus ngunyah.

Tapi pas dia nengok ke samping, si Jambul keliatan beda. Biasanye paling semangat kalo udah ketemu sate buaye, sekarang malah cuma diaduk-aduk doang di piring.

“Kenape sih lu, Mbul? Biasanye paling doyan ma tuh buaye,” tanya si Babeh sambil ngunyah.

Si Jambul diem sebentar, terus ngomong pelan.

“Beh… kenape sih kite malah belain kumpeni, Beh?”

Karuan aje si Babeh hampir keselek.

“Uhuk! Uhuk!” Dia nepok dada sendiri. “Tumben lu nanya begituan. Kenape baru sekarang?” tanyanye balik, matanye nyipit.

Si Jambul narik napas, matanye masih ke piring.

“Iye… aye heran aje. Aye sih paham yang kita tangkep sama kita habisin itu penjahat—yang bikin masyarakat menderita. Aye juga paham, hasil jarahan kita sebagian kita bagi ke rakyat miskin. Tapi tetep aje… yang kita bela kumpeni, Beh. Rasanye ganjil aje di dalem hati aye,” jelasnya pelan, tangannye masih ngutek-ngutek sate tapi kagak dimakan.

Si Babeh diem sebentar. Kali ini dia nggak langsung nyeletuk. Matanye merhatiin si Jambul, terus dia narik napas pelan.

“Nah… ini yang gua demen dari lu, Mbul. Ga salah gua jadiin lu murid. Perasaan lu peka,” ucapnya lebih serius dari biasanya.

Dia lanjut sambil nyender dikit.

“Tapi gini ya… ga semua orang Belande itu jahat. Contohnye di Depok sini. Tuan tanahnye, Cornelis Chastelein, itu orang terkenal baek. Dia beli banyak lahan di sini buat perkebunan. Terus dia manggil orang pribumi buat kerja.”

Si Babeh nunjuk ke sekitar, ke arah jalanan yang tadi mereka lewatin.

“Bedanye… di sini orang jadi pekerja, bukan budak. Sementara di tempat lain, banyak tuan tanah Belande yang masih make sistem budak—kerja rodi, upah kagak jelas, hidup sengsara. Nah si Chastelein beda. Dia malah ngebebasin budak-budaknya, dijadiin pekerja biasa. Digaji, hidupnya diperhatiin. Bahkan gajinye bisa disamain sama serdadu Londo.”

Si Jambul mulai ngangkat kepala, dengerin lebih serius.

“Jadi… kite ini bukan ngebelain kumpeni, Mbul,” lanjut si Babeh pelan. “Kite cuma manfaatin sistemnye buat beresin orang-orang jahat. Kalo ada orang Belande yang bener, kite hormatin. Kalo yang busuk… ya sama aje, kite hajar juga.”

Suasana jadi agak hening sebentar.

Asap sate masih ngepul.

Si Jambul akhirnya ngambil satu tusuk sate buaye, terus mulai makan pelan.

“Hmmm… jadi gitu ya, Beh…” gumamnya, walau mukanye masih nyimpen sisa mikir.