الفصل الثاني : "ليلة قلوب مكشوفه

مقهى شعبي في وسط البلد، في الليل. المقهى مزين بفوانيس خافتة، والأجواء هادئة تحمل صوت أم كلثوم قادمًا من مذياع قديم. يجلس الأصدقاء الستة حول طاولة مستديرة، تتوسطها فناجين القهوة والشاي المعتادة.

عم زكريا:

وهو يضع المشروبات على الطاولة. "اتفضلوا يا جماعة، القهوة المضبوطة لمصطفى، الشاي الأخضر لندى، النسكافيه المزبوط لسندس، والشاي سكر برا لأحمد، والكابتشينو لنادية... والسحلب...منستش طبعا مكسرات زياد للاستاذ خالد زي ما بتحب يا باشا."

خالد:

"الله عليك يعم زكريا جيه ف معاده هوا دا الكلام"

مصطفى:

"طبعا يا عم زكريا، أنت حافظ طلباتنا أكتر مننا."

ندى:

"أنا حاسة إننا خلاص جزء من ديكور المكان."

سندس:

"طب ما هو ده أحلى حاجة في القهوة هنا، بنحس إنها بيتنا التاني."

حازم:

ضاحكًا. "خصوصًا لما نلاقي عم زكريا بيحذرنا من زحمة وسط البلد لو اتأخرنا."

أحمد:

"بالمناسبة، حد فيكم عنده حاجة جديدة؟ أنا بسمع بس كلام عن الشغل والمذاكرة."

نادية:

"أنا مع أحمد في ده. نفسي نكسر روتين الحكايات دي، كل واحد يقول حاجة مش متوقعة حصلت معاه."

مصطفى:

بضحكة متهكمة. "أنا قابلت قطة في الشارع كانت بتزعق لواحد بيأكل كورن فليكس!"

ندى:

موجهة الحديث للجميع. "يا جماعة، بلاش مصطفى اللي يبدأ. سندس، احكي حاجة من شغلك."

سندس:

"الشغل مش جديد أوي. بس كنت بفكر أبدأ كورس في التصوير. دايمًا بحس إن عندي عين كويسة للصور."

ندى:

"يا بنتي، ده بقى قرار ممتاز. أنا أول واحدة هاجي أتصور عندك!"

حازم:

"أنا بقى، مش جديد بس بدأت أتعلم طبخ. الأسبوع اللي فات عملت كريب، بس للأسف طلع شبه المكرونة بالبشاميل."

ليضحك الجميع

مصطفى:

"يا خالد، أنا دايمًا بغير من تعامل عم زكريا معاك. ليه أنت الوحيد اللي بيعاملك كدا؟"

خالد:(ضاحكا)

"عشان هوا بيحبني شفت جواب سهل ومقنع ازاي ولا ايه ي عم زكريا"

عم زكريا:

" طبعا يا باشا ودي فيها كلام وكمان ده استاذ خالد يا مصطفى بيه ، زبون القهوة الأصيل. لازم نكرّمه!"

ندى:

"خالد، بما إنك عزيز علينا زي ما أنت عزيز على عم زكريا، إحكي لنا عن يومك. حساك مشغول شوية النهارده."

خالد:

"بصراحة، كان يوم طويل. رحت الشغل بدري جدًا علشان عندنا تقديم عرض مهم. كنت مجهز كل حاجة، لكن فجأة اللابتوب قرر ينهار قبل ما أبدأ."

سندس:

"أوه لا، عملت إيه؟"

خالد:

"قلبت المكتب، ودورت على أي حد معاه نسخة احتياطية من العرض. لحسن الحظ، زميلتي سلمى كانت محتفظة بنسخة، ونجحنا نقدم العرض في آخر دقيقة. لكن بعد ما خلصت، رحت الجيم علشان أفصل شوية. هناك، طبعا، لقيت إن حازم ما جاش كالعادة!"

حازم:

ضاحكًا. "ما هو يا كابتن، أنا كنت مشغول بتجربة وصفة الكريب اللي باظت."

نادية:

"طب والشغل ياخالد، أخبار العرض إيه؟"

خالد:

"كان ناجح الحمد لله، والرئيس كان مبسوط. لكن الصراحة، طول ما أنا في المكتب كنت بفكر في القعدة دي. وسط البلد والمقهى ده هما اللي بيدوا لليوم طعمه."

أحمد:

"فعلا، المكان ده بقى زي بيتنا. بس كمان الناس اللي فيه هما السبب الحقيقي."

نادية:

تبتسم بخجل. "وأحمد وأنا عندنا سبب يخلي القعدة دي مميزة النهارده."

مصطفى:

"ها! في حاجة يا أحمد؟ واضح إنك بتخبوا حاجة!"