مِحَن بَنات 1:

كتابتي: ماليا✨

طبعا في الفتره الاخيره دي طلعت ظاهره غريبه جدا و هي بنلقى بتين بيحبو بعض او اولاد ايا كان في النهايه ظاهرة المثليين انتشرت عندنا للاسف في مجتمعنا بالاخص بين الطلاب سواء في المدارس او الجامعات ربنا يهدي و يصلح الحال ..في القصه دي ح اتطرق للموضوع دا بالتحديد و يلا نبدا بسم الله

ياااااااه بُكره المدرسه ياخ..فرحاااانه عشان نازله تامنه و زعلانه عشان الاجازه انتهت و القرايه اووووف

دي ميثاق شافعه زي م عرفنا نازله تامن قصيروونه سمرا ملامحها اقل من عاديه بس مرحه حبوووووبه بتحب الناس بتدخل فيهم بسرعه شديده.. عندها 12 سنه عندها اخت اسراء في تالت ااساس و اخ عمر داخل الروضه ..والدها ابراهيم دكتور شغال في عيادة الحي الساكنين فيهو ..والدتها امال معلمه في نفس المدرسه البتقرا فيها

اول يوم صحت بكل كسل و لبست مشت المدرسه اصلا قريبه من البيت شديد .. ماشه و زهجانه علي امل تلاقي وحده من صحباتا لكن خاب املها لحد م وصلت باب المدرسه براها لقت حجر قدامها شاتتو بزهج و البنات كتيراااات داخلات و هي م عندها نفس تخش المدرسه رفعت راسها لاقت بت جيرانهم و صحبتها اسمها لبنى حلبيه لمن حمرا سلمت عليها عادي مافي شوق {هههه امس كانو سوا} لبنى دخلت اول.. ميثاق رفعت راسها تاني شافت وحده غريبه طبعا بما انهم في حي بسيط الناس كلها محفوظه و عارفه بعض فسهل جدا يتعرف الغريب بينهم ميثاق عاينت للبت بكل غيظ كانت ملامحها حلوووه و حلبيه و كانت طويله و باين انها حبابه لكن ميثاق م حبتها نهائي قالت في سرها يا رب م تطلع بتقرا معانا اوووف لكن طولها دا اكيد معانا لالا ياخ ان شاءالله تكون في سابع المهم م تقرا معانا ,, و دخلت المدرسه في شجر بلاقيك من تدخل لحد مساافه لقدام علي جوانب المدخل دخلت الفصل لاقت صحباتا وبدا موال الجن و السلام مع انهم متلاقين امس بس برضو لمة المدرسه غير ههههه من بين الناس و الجوطه دي لمحت البت الجديده قاعده في الكنبه التانيه علي الحيطه جنب لبنى عاينت ليها بغضب و م اشتغلت بيها تاني

الجرس ضرب الفصل بقى فاضي م فيهو غير ميثاق و صحباتا يضحكو و يكوركو قالو م ماشين الطابور فجأه يسمعو صوت باب الفصل ضرب بكل قوه و صوت راجل يقول دا شنو دا الجرس دا مش ضرب م طلعتو ليي و بيكورك اطلعو يلا ..استغربو طبعا لانو المدرسه م فيها رجال المهم ميثاق طلعت كالعاده في المقدمه و اتجاوزت الراحل قال ليها وين وين وين تعالي هنا جاتو مستغربه قالت ليهو شنوو

الراجل :شنوووووو ..انتي م عرفتي انا منو صح؟

ميثاق : لا صراحه م اتلاقينا قبل كدا

الراجل : اممم و قليلة ادب كمان

ميثاق: قلة الادب وين في الموضوع قلت ليك م اتلاقينا انا بجد م شفتك قبل كدا

الراجل و شواطين الدنيا ركبتو :افتحي يديكي

فتحت ليهو يدها الشمال

الراجل: الاتنين

ميثاق: م بفتح غير دي

الراجل فار فيها ,ضربها 3سيطان زي السم قال ليها طيري يلا

اكلت اكلتها و طلعت مشت الطابور شويه كده صحباتا جو لاحقنها يتراقصو زي السكرانات و يضحكو ضحكت قالت ليهم م قال ليكم دا منو و بعدين مالو نافش ريشو كدا دا من صباح الرحمن عامل صلعتو دي

براءه:بري تراهو ادانا سيطانا ديل و قال لينا اتفكفكن يفك حنكو

وداد:والله قايلاهو قسم الله سيد العده

ريان:خلاص اسكتو اسكتو و انتي يا ميثاق امك بتتكلم اسي بتهدف علينا

قبل م تتم كلامها ام ميثاق قالت تعالو و هي بتأشر عليهم نفس الشله مشو ليها ريان و وداد و براءه اما ميثاق ابت تتحرك ام ميثاق قالت ليهم طبعا الطابور عليكم عشان اول يوم دراسه و انتو اكبر ناس هنا يلا قدمو الطابور

للصراحه م عرفت تختار نهائي ريان زوله هادئه و خجوله م زولة برامج

وداد زوله مهترشه ساي كان سالوها من اسمها بتضحك و براءه نفس وداد بس دي بتقول ليك اااا؟؟شنوو؟ و بتضحك

ميثاق كانت في طرف الصف بعد ديل مشو زحت شويه لقت نفسها واقفه جنب البت الجديده اتنرفزت قامت طوالي طلعت المسرح لقت ديل يضحكو ومحتارين يقولو شنو وقفت بكل جرأه عملت مقدمه و قبل م تواصل جا الراجل تاني وقف و قاطعها و اتكلم كتير من ضمن الكلام دا وضح انو المدير الجديد و بي كلمتو دي قبل عاين للجماعه قال للناس ال ما شافوني قبل كدا .. طبعا برضو غريب عن البلد فما في زول عرفو ..هنا ميثاق قالت كتتتمت..