_أم علي:بسرعة ميمة طلعي القاط مال مؤيد؛

بسرعة استعجلي ما ضل هواي وكت نص ساعة وتوصل سيارة الزفه.

_ريم:أوكي ماما بس خلي اكمل شسوار شعري

*الدنيا مخبوصة خبص كل عمامي من بغداد إجو بس المزعطة مالتهم تسوة ذاك الحساب واحنة بيتنة مو كلش جبير بلا مبالغة 300 متر  والزلم صايرة محاشگ بالحديقة، و على ساعه گبت الهلاهل عرفت وصل علاوي ، ما ظلوا هواي حتة كاموا الزلم يصيحون يلة يلة بسرعه وصلت السيارات ركبوا راح نروح للقاعة.

*طبعا شايفين لمن تريد تكشخ وتروح لمكان وبعدين تنصدم تطلع اتعس من شكلك اول الصبح.

مختصر الكلام هذا الي صار وياية بيوم زفة اخوي.

_أم علي: وچ ميمة وصلت السيارات وانتي لا انتي المبدلة ولا المبدلة اخوج.. ارتاحيتي؟

_أم محسن: علكيفچ عيني وية البنية!!

_أم علي:موو صارلي سنة كايلتلها اخوج القاط مالته لبسي هياه

_أم محسن:ههه هسه انتي شوفيها تفتر منا ومنا اكييد ضيعت الكعب..

_ريم:آني سمعتها كلتلها * باجي فدوه والله مثل ما كلتي الكعب مدريني وين حطيته

_أم محسن:ههههه

_أم علي:اهاا يعني صدك ضيعتيه؟! يا ول بخت امشي دوري عليه

_ريم: ايي لعد شدا اسوي ؟؟

*امشي واندب حظيي ما بقه مكان ما دورته و القندرة ما هيه ما هيه، آخر شيء اتذكرت تركتها بالمطبخ *** الميز ، ركضت ع المطبخ و فتحت الباب بسرعه وجان انطخيت بواحد آني وكعت وهو مثل الصخل واكف ما بي شيء..

_عمر: اوه سوري

*كعد و مد ايده عود يكللي كومي ، آني دفرت ايده وكمت

_ريم: فك ياخه موو بحالك

_عمر:اهوو تره والله موو قصدي انتي فتحتي الباب وهجمتي جنج وحده كعد تشن غاره

_ريم ؛آني اصلاا مطايقته ، اتنرفزت وكتله:شوف آني هسه موو بحالك روحي واصله لخشمي دخييل الله وخر خليني اشوفف دربي

*هو صفن بعدين سكت دار وجهه وطلع للحديقة ،كعدت لكيت الكعب و أخيراا لبسته وكفت كدام المرآيه اتمايز جمالي و ما أشوف اله رد فتح باب المطبخ دنك رأسه وكال

_عمر:بالمناسبة طالعه حلوه فد شيء

*و ضحك بصوت عالي،سد الباب و راح وكف يم علاوي يحجي وياه و كل شويه يطكها ضحكه ، طبعاا لاحظت انو علي ما مرتاحله و هو هم لاحظ انو علي متضايق بس غلس و سوه نفسه طبيعي.

*طبعا اعرفكم ، عمر هو ابن عمي رائد ميفكر بشيء غير مصلحته و صورته كدام الناس شخص استغلالي الى درجه فظيعه ماخذ شكو صفه تعبانه من عمي الچبير رائد(ابو عمر) واصلاا علاقتنه مقطوعه ويه بيت عمي رائد اكثر من 5 سنين بسبب مشاكل ع الورث خلت بابا و عمي ميحجون سوه نهائيا، مع ذلك بابا عزم عمي ع الزفه مال أخوي كال ميصير هوه يبقى اخويه و حزام ظهري اذا هوه ما أعزمة لعد المن أعزم؟؟!

*بسرعة أخذت القاط مالت مؤيد و ركظت ع السيارة عود كلت ابدلة هناك.

_ضحى: تعالي صعدي اني حجزتلج هذا المكان

_ريم:وچ اني بيا حال؟ اخذي مؤيد من إيدي!

*اخذته ضحى من ايدي وصعدت ما طولت دقائق

وراية اجت امي وأم محسن وأم شيرين(خالتي)

ركبن و مشت السيارة طبعا إذني ماعت من الصوت العالي مثل ميكول المثل "عرس و عد رگاصة" أخيرا وصلنة للقاعة نزلنة من السيارة

و طبينة للقاعة المعازيم تارسيهة ترس تريد تتنفس متكدر طبعا العرس مختلط وصوت الاغاني مو انصة من الصوت اثناء الطريق

صار بوجهي بابا

_ابو علي: وين عمر شفتي!؟

_ريم:شكو ليش تدور عليه؟

_ابو علي :حبابة روحي شوفيليا وينه كليلة اريدة

يروح يجيب الاكل من المطعم بسرعة، فهمتي؟

_ريم:اوكي هسة اكلة.

*رحت ادور ع الگمر تالي لگيتة وية 3 بنات واكف يسولف ويضحك

_ريم :ولو زحمة عيني ممكن دقيقة من وگتگ؟

_عمر:أكيد حبي الغالي.

*جاوبني والابتسامة تترس وجهة وعاف البنات و اجة يمي و كال

_عمر:شگو عيوني شعجب تدورين علية؟ خاف

رايدة تصارحيني بهيچ مكان؟؟!

_ريم:هه هه هه ماسخة

اسمع بابا يكول ممكن تروح للمطعم وتجيب صناديگ الغدة بلا زحمة؟؟

*شافلي بنظرة عدم رضا وكال

_عمر :اوك تدللين من هاي العين لهاية بس امري.

_ريم :خوش تفضل بسرعة ما اريد بابا يحچي ويكول وين صار الأكل؟ مفهوم؟

*اشرلي براسة انو فهم درت وجهي وما عرت اهتمامة اي بال ورحت ركض اخذت مؤيد ع الحمامات بدلتلة ع السريع وخليتة يوكف علما اجر اي لاينر ونروح سوة يم علاوب

*مؤيد:بسرعة ميمة خلصتي؟!

_ريم :دقيقه هسة ما بقالي شي..

*خلصت العين الاولى وانتقلت للثانية اريد اسويهة واذا صوت عالي مبين مو صوت اغاني ولا مسيقا وطبوا ولد خالي للقاعة يصيحون قصف...!! قصف...!! إشردوا!!! ما كو ثواني وأحس

روحي بالگاع گوة أجر أنفاسي....... ربي سترك....!!

تأليف/زينب السراي

                          يتبع...