حكايتي بلا بيك ناقصة

يا اختي يا قطعه من قلبي كيفاش نعيش بلا بيك؟ كيفاش نصبر وحدي. من نهار مشيتي بصفاقس الدار ولات خاوية حتى الضحكة ناقصة و الروح ولات باكية . نحكي معاك في التلفون ،نحس صوتك قريب لكن وين حظنك في بعدك القلب غريب إنتي الفرحة إنتي النور إنتي نبض حياتي ما نجمش ننساك إنتي ديما في ذكرياتي.ربي يوفقك في قرايتك.

"انتي ماكش بعيدة على خاطري، كل لحظة نعيشها نحسك فيها معايا، في ضحكتي، في وجيعة قلبي، حتى في سكاتي. كل ركن في الدار ينده باسمك، وكل صورة في خيالي تحكي عليك. يا أختي، الغياب صعيب أما محبتك عمرها ما تغيب. ربي يحفظك وين ما تمشي، وإن شاء الله الأيام تجمعنا قريب، ونرجعوا نضحكوا مع بعضنا كيف بكري، بلا دموع، بلا بعد.

"كل يوم نفيق ونقلب وجهي للجهة اللي كنتي فيها، نتفكر صوتك، ضحكتك، خطواتك في الدار. كانت أيامنا بسيطة، لكن عمرها ما كانت عادية. انتي اللي كنتي تنوري نهاري، وتهوني عليا وجيعة الدنيا. توا كي نسمع صوتك في التليفون، نفرح شويه، أما الفرحة منقوصة، كيف كي تشرب ميّة ومانهاكش عطشك. ساعات نقعد نحكي مع صورك، نفضفض، نبكي، نضحك، نحس روحي نحكي معاك عن قريب. الدنيا بلا بيك موحشة، حتى لو فيها ناس، فيها حكايات، القلب يعرف روحو ناقص. برشا مناسبات عدّيتها بلا بيك، ضحكت فيهم والدمعة مخبيّة، على خاطر الضحكة بلا أختي ما تسواش. يا ربي تجمعنا عن قريب، وتفرّح قلبي برجعتك. أما حتى وانت بعيدة، ديما نقول: أختي ما فارقتني، أختي ساكنة في قلبي، وقلبي عمره ما يرحّب بحدّ غيرها."

"كل زاوية في الدار تحكي عليّك، كل تفصيل صغير ينده باسمك. كرسيك الفاضي، كوجينتك اللي ما عادش فيها ريحة قهوتك، حتى صوتك وهو يندهلي من بعيد ما عادش موجود، وكل هذا خلاني نحس كأني نعيش في فراغ كبير. كنت دايمًا تحضنيني بكلامك، بنصايحك، حتى بسكاتك اللي كان يطمنّي. اليوم كي يصيرلي حاجة، نخمّم فيك أول وحدة باش نحكيلها، وبعدين نتفكر إنك بعيدة، وإنه لازم نكبت كل حاجة في قلبي. نكتبلك، نحكي مع صورتك، نضحك وحدي على ذكريات جمعتنا، ونبكي وحدي كي نتفكر اللي ما عادش نجم نعيشها.

بعادك علّمني برشا حاجات، علّمني كيف الوجيعة ممكن تسكنك بصمت، كيف الاشتياق يقدر ينهش فيك كل يوم وأنت ساكت. تعلمت كيف نعيش بنص قلب، والنص الثاني مشى معاك وقت سافرتي. نغار من الناس اللي عايشين مع خواتهم، نغار من الضحكات اللي نسمعها بيناتهم، أما في قلبي ديما ندعي لك بالنجاح، ونفرحلك من بعيد، لأن محبتك ما فيهاش أنانية.

كل ليلة نرقد على أمل نسمع طرق بابك، نركض ونلقاك واقفة، ضاحكة، تقوليلي: "رجعت". أما الوقت ما يرحمش، والشوق ما يهدأش، وكلماتك في بالي كل لحظة. نلبس حاجة من حاجاتك، نسمع أغنية كنا نغنيوها سوا، نرتّب سريرك كيف ما تحبي، نعيش تفاصيلك الصغيرة بش نرضى قلبي اللي مشتاقةلك. ورغم بعدك، حسّك باقي، طيفك حاضر، وأثرك عمره ما يتنسى.

يا أختي، مهما طال البعد، نبقى نستناك، ونحكي عليك، ونكتبلك، ونعيشك في كل حرف. ربي يوفقك وين ما تكوني، ويوصلّك إحساسي، ويحنّن الأيام حتى ترجع تجمعنا، خاطر بلا بيك، الدنيا دايرة لكن ناقصة، عامرة لكن باردة، وانا، ديما نحبك... ديما نشتاقلك."

"حتى ماما وبابا ما خفاوش عليهم دموع الغياب. ماما تحاول تكون قوية قدامي، تخبّي شوقها تحت ابتسامة، لكن عينيها تفضحها كل ما نشوفها قاعدة تحضّرلك أكلك المفضّل وكأنك باش تدخل من الباب فجأة. تسكت، تنزل عينيها، وتقول 'ربي يسهّلك'. أما في الليل، نسمع صوتها في الصلاة، تدعي لك، وتبكي بهدوء. وبابا، اللي ديما كان الجبل اللي ما يهزش ريح، توا ساكت أكثر من العادة، يخرج كل صباح يتفقد الدار، يحكي عنك من غير ما يذكرك، وكأنك ساكنة في كلامه وهو ما يحبش يفيّق الوجيعة.

ما تعودناش على النقص هذا، انتي كنت الفرحة اللي تلمّنا، صوتك، ضحكتك، حتى مشاكلك الصغيرة كانوا يعمّروا الدار. كي تروّحي، ماما تطبخ أكثر، تزين الطاولة، تحاول ترجع كل شيء كيف بكري. أما الحقيقة تفرض روحها: بلاك، الدار تغيرت، نحنا تغيّرنا، لكن محبتنا ليك ما نقصتش، بل كبرت مع المسافة، وولات أعمق.

أنا نحاول نكون قوية، باش ما نقلقهمش، باش نكون سندهم وانتِ بعيدة. نحكي عليهم كي نحكي معاك، باش توصلك ريحتهم، دفئهم، وخوفهم عليك. كلنا نعدّو الأيام، نستناو نهار ترجع فيه الضحكة على وجوهنا كاملة، مش ناقصة. انتي موش مجرد أخت، انتي الرابط اللي يخلي العيلة متماسكة، وكلنا من غيرك نعيشو نصّ حياة.

أحنا بخير، أما بخير من غيرك ما تعنيش نفس الشي. وربي يجمعنا عن قريب، في حضن ماما، وسط ضحكة بابا، ودفى العيلة اللي عمرها ما اكتملت إلا بوجودك

*** قم بتنزيل NovelToon للاستمتاع بتجربة قراءة أفضل!***